Besimtarët myslimanë festojnë sot festën e Kurban Bajramit. Ceremonia e Bajramit u organizua si çdo vit në bulevardin “Dëshmorët e Kombit”, ku mijëra besimtarë myslimanë falën namazin e Kurban Bajramit, ndërsa qindra-mijëra të tjerë kanë festuar dhe kryer faljen në sheshet e qyteteve të ndryshme të vendit.
Para faljes së namazit të Kurban Bajramit, besimtarët ndoqën një program të shkurtër gjatë të cilit u përcollën mesazhe urimi dhe paqeje. Programi filloi me këndimin e një pjese nga Kur’ani Famëlartë. Më pas ceremonia vijoi me fjalën përshëndetëse të kryetarit të Komunitetit Mysliman të Shqipërisë, z. Skender Bruçaj, i cili uroi besimtarët myslimanë dhe gjithë shqiptarët për më shumë mirësi, harmoni, paqe dhe dashuri mes njëri-tjetrit.
“Kjo ditë e madhe, Kurban Bajrami, vjen sot për t’i sjellë botës mesazhin e respektit, tolerancës, dashurisë dhe sakrificës. Kjo është dita kur i shërojmë plagët që i kemi shkaktuar njëri-tjetrit me buzëqeshje dhe gëzim, me paqe dhe vëllazëri. Urimet dhe vizitat e Bajramit janë tradita të vyera të popullit tonë, të cilat kanë lënë gjurmë të thella e të pashlyeshme. Nisur nga kjo, le të shërbejnë këto ditë feste për më shumë mirësi, harmoni, paqe dhe dashuri mes njëri-tjetrit, në të mirë të shoqërisë, kombit dhe gjithë njerëzimit”, u shpreh Bruçaj.
Pas faljes së namazit të Kurban Bajramit besimtarët dëgjuan ligjëratën e posaçme nga Myftiu i Tiranës, Ylli Gurra, i cili i ftoi njerëzit drejt solidaritetit dhe drejtësisë.
“Në ditën e Bajramit bashkohemi së bashku për të përcjellë falënderimet dhe mirënjohjet ndaj Allahut xh.sh. Kurban Bajrami është dëshmia e përkushtimit tonë ndaj krijuesit, dëshmia e solidaritetit dhe bindjes. Në këtë festë ne duhet ti themi jo indiferencës sociale. Të lehtësojmë të tjerët dhe të jemi me të drejtën. Bardhësia e shpirtrave të myslimanëve në këtë shesh dhe në sheshet e gjithë botës është drejtuar me lutje dhe përgjërime ndaj të Madhit Zot”, tha ndër të tjera Myftiu i Tiranës, Ylli Gurra.
Mesazhe respekti e mirëkuptimi përcollën edhe folësit e tjerë, të cilët vlerësuan Kurban Bajramin si formues të një tradite që nxit përkrahjen dhe ndihmën reciproke ndaj njëri-tjetrit, për një familje dhe shoqëri të shëndoshë.
Në fund, besimtarët shkëmbyen mes tyre urimet më të përzemërta për këtë festë të dashurisë dhe sakrificës. Mes urimesh dhe lutjesh besimtarët u larguan nga sheshi për të kryer obligimin e bërjes së kurbanit, si dhe për të kryer vizita te të afërmit e tyre.
Për besimtarët myslimanë Kurban Bajrami është festa që simbolizon sakrificën sublime të profetit Ibrahim, dorëzimin tek Krijuesi dhe vendosjen e dashurisë hyjnore mbi atë njerëzore. Me emrin e kësaj feste janë të lidhura ngjarje madhore që kanë ndryshuar rrjedhën e historisë, si: rindërtimi i Qabes, haxhi, emërtimi “mysliman”, etj. Kurban Bajrami ka një rëndësi të veçantë edhe nga aspekti shoqëror, pasi fton njerëzit të ndihmojnë nevojtarët dhe të forcojnë lidhjet me të afërmit.
12 Shtator 2016
